三談國家隊救市

為何內地股市單日大瀉近9%，就認為國家隊撤軍？

點解以前上證2000點係鐵底？因為2012至2014間每次跌穿2000都能迅速返回其上。若共產黨的救市防線定响上證3600點，只要照辦煮碗，每次觸及3600點便反彈，市場便會由唔信救到市變為半信，半信變為全信，3600點成新鐵底，股民便放心重新入市。建立股民信心需要時間，期間上下其手响期貨市場搵吓錢，兼震走部分冇信心的好友有何不何！小弟覺得國家隊容許大市單日大跌近9%，此招實在高明。

救市成功與否要睇新加波A50期貨未平倉合約數，不要開玩笑啦？如果錢解決到的問題，小弟深信共產黨實搞得掂。

再談國家隊救市

財經記者始終非在金魚缸炒慣之輩，寫國家隊救市的報導有缺失在所難免。但有些股評人也寫埋D完全不似行內人常識的文章，驃叔叔實在詫異！

新加坡A50期貨戰場，國家隊鞭長莫及。
點解國家隊唔可以參與新加坡A50期貨戰場？計好數持些好倉有何不可。

新加坡A50期貨7月的未平倉合約高企，淡友未收手。
期貨合約要有齊買方和賣方才能成約，你話好友未放棄都得嫁。

新加坡A50期貨8月未平倉合約高企，淡友在轉倉。
又係果句，一張淡倉自然有一張好倉。同埋你唔畀國家隊响低位累積咗大量好倉，8月繼續上下其手咩。

總結一句，你估外資持有的A股真係多到可以推冧A50咩！意欲借貨沽空？想坐監咩！

(30/7/2015 8:55 更新：生果日報網上財經版：「......H指即月期指亦增加近7,200張，至13.89萬張，連同下月期指17.86萬張......」，錯到離晒譜！)

你以為國家隊係山西豆腐隊嗎？

七月十九日開始重感冒，今天好了七成，有精神寫吓嘢。

共產黨話要救市，就一定要救到。若果畀全中國人民知道共產黨承諾的事辦不到，共產黨還能出嚟行嗎？

咁為何昨天內地股市大瀉近9%？小弟推測，國家隊一路買貴貨托市，總要想些辦法減低成本。於是响期貨市場搵食，一邊持好倉，到咁上吓又整番D淡倉，殺一殺國內跟風持好倉的炒友。小弟估計國家隊的戰場，甚至已漫延至新加波的A50期貨。難得有外國勢力送上門跟錢多貨更多的國家隊比試，何樂而不為呢？你認為由金融精英組成的國家隊係山西豆腐隊，曾蔭權做到的事，國家隊會做唔嚟嗎？

雖然寫咗上高一大段嘢支持國家隊，但今天冇响3630點買滬深300，正宗馬後炮，死剩把口！

驃叔叔的賭博方法 續

上次驃叔叔介紹的資產增值方法，絕不推薦其他人模仿。就算閣下膽正命平，也不用學小弟槓桿再槓桿。

小弟認為最適合普羅大眾的投資方式乃價值投資，Blog界有不少知名價值投資派高手，可供大家參詳。不過有云「條條大路通羅馬」，若目標係資產增值，天下也有其他途徑可行，但可能崎嶇好多啫。

價值投資又好，投機賭博也好，兩者沒有衝突。驃叔叔其實頗討厭一些尊價值投資為真理，未有深入理解其他方法就肆意批評的價值投資人。「勤有功，戲無益」，凡致志鑽研者，都應尊重。

驃叔叔的賭博方法

如果以為响股海賭博等於炒短線便錯了。小弟乃普通打工仔，不能如偉哥那邊的捧場客一樣由開市炒到收市。其實小弟是炒長線的，依家楂的國期個個月轉倉，差不多有一年。誰人話期指只可拿來炒？小弟偏偏攞嚟楂，牛市有幾耐就楂幾耐，因為小弟求的是賺大錢而非賺快錢也。

另外跑贏大市太艱鉅了，小弟只求同步便可。因此小弟以國期為工具，務求倍大回報。明知自己揀股唔叻，又想賺大錢，只好心口掛個勇字，拿支槓桿做莽漢衝衝衝。

當然這是否最適宜驃叔叔的賭博方法，小弟還是摸著石頭過河，用全副身家性命財產嚟驗正。今次這個大跌浪，雖然令今年的利潤化為烏有，但暫且冇輸到負資產，總算過了第一關測試。大家看了我的賭博方法，便明瞭為何小弟咁緊張大市是牛還是熊呢！

驃叔叔相反理論

自上周一第一篇文章起，是否發覺驃叔叔次次都錯呢！既有周一話short put周三止蝕，又有周二晚話全面平倉，只要當驃叔叔係「燈」調轉嚟做就必賺，這就是驃叔叔「相反理論」！

賭博世界裏，少數人贏，多數人輸乃不變定律。驃叔叔只是普通賭仔，因應市場變動而作出的首個反應跟多數人一樣，後果當然係輸錢啦。古諺「三思而後行」係啱，但以小弟的資質，「五思而後行」都可能仍是錯。唯望以後「七思而後行」，令驃叔叔「相反理論」失效啦。

牛定熊？

小弟尋日止蝕A50 short put，當然預料不到今日共產黨大小股指大升。小弟學藝未精，共產黨好嘢！

雖然小弟持有不少價值股，但絕非價值投資者。價值投資者可以唔理牛市定熊市，小弟係賭徒，身處牛市定熊市的賭博策略完全不同。

又係問返星期一那個問題，你相信香港股市牛市還完嗎？
信，不過會減注，待有明確止蝕位才加注。

是否覺得小弟一時一樣，剛剛話清倉，依家又話牛市未完，究竟想點？因為賭仔信唔過囉！

我愛共產黨

今日共產黨唔托大股，轉托創業板。碰巧今天上午出外工作，未能以好價平了那些A50的short put，最後下午只能以衰價平倉。

話雖如此，我還是很感謝共產黨。沒有共產黨參與，股市那有大波幅。沒有大波幅，我等賭徒那有咁多搵食或輸錢機會。至於搵食定輸錢就睇閣下身手矣。最後肉麻講多一句，我愛共產黨。

重蹈覆徹

唔知乜嘢事期指夜市係咁插，我決定做一件這世仔第一次做的事──全面平倉！

十幾年來除非個袋冇錢，否則一定有倉在身，而且係好兇狠果隻。曾經三落(負資產)三起，家吓就嚟不惑之年，我唔想重蹈覆徹又負資產呀！

價值股大平賣，但可以再平！

今日再跌，今年盈利化為烏有，只怪自己懶散，兼且炒賣功夫未到家。

昨天講過沽A50put，考慮一番後還是沒想像咁，小注還何，重注不宜，留多些資金旁身似乎更佳。

今日再跌一浸，好多價值股變得好吸引。但低處未算低，大媽要套現，可以沽得更低，隻1866心連心沽到day low收咁滯可見一班。今朝小弟入咗三隻，結果又坐艇，太心急考慮未夠周詳矣！

你相信共產黨嗎？

你相信中港股市牛市未死嗎？信
你相信共產黨乜都夠膽死嗎？信 (起碼今日信)

結論
一. 二百五十天線係牛市絕佳入市位
二. 這刻最佳賭博工具係short put即月等價或輕微價外的A50，滬深300，信共產黨死撐住滬深300响四千點樓上